De Woch up Platt in MV: NATO-Äuwung, Drohn’ un de Nurddüütsche Dach
Manöver un ein nieger Kierl bi Hansa: De Nårichten ut Mäkelborg-Vörpommern von denn 2. bet tau denn 8. Juni 2025.
Manöver up de Oostsee
Up de Oostsee hett de NATO mit ehr Manöver BALTOPS anfungen. Tau’t ierste Mål von Rostock ut. De taukåmen vierteihn Dåch äuwen 9.000 Suldåten ünnerscheidliche Aktschonen up 50 Schäpen un Schlupen. Dorbi dreiht sik dat ünner annern dorüm, woans’n ein Ünnersee-Boot afwehren un de Luft deffendieren orrer ok Kampmiddel wedder uprümen kann; äwer ok üm Insätz mit Dükers un üm Minschen tau bargen. Doröwer rut äuben sei ok ofteins dat Scheiten. Baltic Operations, kort BALTOPS, löppt all siet 1971 einmål in’t Johr ümmer up de Oostsee.
Bäderdeinst geiht wedder los
An de Wåterkanten von Vörpommern fangt de Bäderdeinst wedder an. Schandarms ut anner Gägenden helpen bet in denn Septembermånd rin ehre Kollegen jüst dor, wo sünnerlich väl Minschen Urlaub måken. Vergåhn un Verbräken sallen dormit fixer vör Dach kåmen. De Bäderdeinst will dat Gefäuhl för Säkerheit bi de Gäst un bi de Inwåhners starker måken.
Drohn œwerwåkt Båd‘wåter
In Nuurdwest-Mäkelborg œwerwåkt von nu an ok ein Drohn, wo gaut dat Båd’wåter in de Gägend is. De Lüttfleiger stüert von de Luft ut all 42 Badestäden von den Landkreis an un œwernimmt ein’ Deil von de Sicht-Kuntrullen, so seggen sei dat bi denn Landkreis. De Drohn kann tau’t Bispäl rutkennen, wo Placken von Blåge Algen entståhn.
Nieger Bås bi denn Vörstand von Hansa
De FC Hansa Rostock hett‘n niegen Bås von denn Vörstand. Nådäm sei Jürgen Wehlend vör de Dör sett harrn, œwernimmt nu Roland Maul denn Posten. Maul harr all as Späler dat Trikot von Hansa drågen, von 2001 bet 2006.
Nuurddüütsch’ Dach in Dömitz
Up de Festung von Dœms ward an’n Sünndach de Nuurddüütsche Dach fieert. Mit ein grot plattdüütsch’ Programm. Dorbi sünd ünner annern de Muskanten von Tüdderkram ut Wismer, de Shantychor „Achtern Moehlendiek“ ut Hagenow un de Sängersch Norma ut Hamborg mit ehre Band. Dortau gifft dat’n Markt mit Kunsthandwarkers, Späle för Kinners un Führungen up Hoch un Platt. De Stadt Dœms richt’ den Dach tausåmen mit denn Heimatverband M-V ut.
